Pro 31 | NdeIBE | STEP | Ngamazwi enkosi uLemuweli

Proverbs 31

1 Ngamazwi enkosi uLemuweli – lizilo alifundiswa ngunina:

2 “Hawu, ndodana yami! Hawu ndodana yethumbu lami! Hawu, ndodana yezifungo zami,

3 ungadlalisi amandla akho ebafazini, izifutho zakho kulabo abadiliza amakhosi.

4 “Kakusikho kwamakhosi, bakithi Lemuweli – kakusikho kwamakhosi ukunatha iwayini, kakusikho kwababusi ukunxwanela utshwala,

5 funa badakwe bakhohlwe izimiso zomthetho, behluleke ukumisela kuhle abahluphekayo amalungelo abo.

6 Phana utshwala kulabo abavele sebezifele, iwayini kulabo abalosizi olukhulu;

7 kabanathe bakhohlwe ubuyanga babo bakhohlwe nya usizi lwabo.

8 “Bamele labo abehlulekayo ukuzikhulumela, uwamele amalungelo alabo abangelalutho.

9 Khuluma njalo wahlulele ngokulunga; alwele amalungelo abayanga labaswelayo.”

10 Ngubani na ongathola umfazi olesimilo? Uligugu elidlula kakhulu amatshe amahle.

11 Indoda yakhe iyamthemba ngokupheleleyo njalo kayisweli lutho oluqakathekileyo.

12 Uyenzela okuhle, hatshi okubi, empilweni yakhe yonke.

13 Uyakhetha kuhle iwulu lesikusha akweluke kuhle ngezandla ezikhutheleyo.

14 Unjengemikhumbi yabathengisi, eletha ukudla okuvela kude.

15 Uvuka ekuseni kusesemnyama; alungisele abomuzi wakhe ukudla abele lezincekukazi zakhe.

16 Uyayihlolisisa insimu mandulo kokuyithenga; ngalokho akuzuzayo uyahlanyela isivini sakhe.

17 Uwubamba ngokukhuthala umsebenzi wakhe; aqinise izingalo zakhe emsebenzini.

18 Uyananzelela ukuthi ukuthengisa kwakhe kulembuyiselo, lokuthi isibane sakhe kasicimi ebusuku.

19 Uphatha uluthi lokuphotha ngesandla sakhe abesebamba ngeminwe yakhe isigudugudu sokweluka.

20 Welula izingalo zakhe kubayanga njalo ulezandla ezilula kwabaswelayo.

21 Lapho kukhithika ungqoqwane, kalakwesaba ngabendlu yakhe; ngoba bonke bagqoke ezibomvu.

22 Uthunga izigubuzelo zombheda wakhe; agqoke ilineni elihle lezigqoko eziyibubende.

23 Indoda yakhe iyahlonitshwa enkundleni lapho efika ihlale ndawonye lezikhulu zelizwe.

24 Uthunga izigqoko zelineni azithengise, abathengi bemigaxo bayizuza kuye.

25 Wembethe amandla lesithunzi; uyahleka loba kusiza izinsuku ezimbi.

26 Ukhuluma ngenhlakanipho, lezeluleko eziqondileyo zisolimini lwakhe.

27 Unqinekela ezomuzi wakhe njalo kadli isinkwa sobuvila.

28 Abantwabakhe bayambonga bathi ubusisiwe; lendoda yakhe layo iyamdumisa ithi,

29 “Banengi abafazi abenza izimangaliso zobuhle kodwa wena uyabedlula bonke.”

30 Ukubukeka kuyakhohlisa, lobuhle buyaphela; kodwa umfazi owesaba uJehova kadunyiswe.

31 Kaphiwe umvuzo wobuhle abenzayo, imisebenzi yakhe imlethele udumo enkundleni.